Sunday, November 19, 2006

സ്നേഹിതയേ സ്നേഹിതയേ

ഞങ്ങളുടെ സദസ്സുകളില്‍ നിന്നെപ്പറ്റി പ്രതിപാദിക്കുമ്പോള്‍ കുതിര എന്ന വിളിപ്പേര് എന്റെ കൂട്ടുകാര്‍ ഉപയോഗിച്ചിരുന്ന കാര്യം നിനക്കറിയാമായിരുന്നോ? നിന്റെയാ ഉയര്‍ന്ന നാസികയും അല്‍പ്പം വിടര്‍ന്ന അധരങ്ങളുമാണ് ആ പേരു വീഴാന്‍ കാരണമെന്നാണെന്റെ ഊഹം. പിന്നെയെപ്പൊഴോ ആ അരക്കിറുക്കന്‍ ഇയാന്‍ കാസ്റ്റിലാ‍നോ ഇംഗ്ലീഷ് ക്ലാസ്സില്‍ കുതിര രതിയുടെ പ്രതീകമാണെന്നു വിശദീകരിച്ചപ്പോള്‍ എന്റെ കൂട്ടുകാര്‍ നിന്നെ നോക്കി അടക്കിച്ചിരിക്കുന്നത് നീയും ശ്രദ്ധിച്ചിരുന്നെന്നാണെന്റെ ഓര്‍മ്മ.

നീ ഞങ്ങളുടെ ക്ലാസ്സില്‍ താമസിച്ചായിരുന്നല്ലോ എത്തിയത്. ഒന്നാം വര്‍ഷം കഴിയാറായപ്പോള്‍ മറ്റൊരു കോളേജില്‍ നിന്ന് മാറ്റം വാങ്ങിയെത്തിയ നിനക്കു മുന്നെ നിന്നെപ്പറ്റിയുള്ള കഥകള്‍ ഞങ്ങളുടെ ക്ലാസ്സില്‍ എത്തിയിരുന്നു. നീ പഴയ കോളേജില്‍ വിവാദമായൊരു ചുംബനരംഗത്തിലെ നായികയായതും, ആരോ അത് കണ്ടതും അങ്ങനെ നീ അവിടെ നിന്ന് പുറത്താക്കപ്പെട്ടതുമൊക്കെ ഞങ്ങളറിഞ്ഞിരുന്നു എന്നു നിനക്കറിയാമല്ലോ. അതെ, നിന്റെ ബാല്യകാല സുഹൃത്ത്‌ റോബിന്‍സണ്‍ തന്നെയായിരുന്നു നിന്നെപ്പറ്റിയുള്ള വാര്‍ത്തകള്‍ ഞങ്ങളെ അറിയിച്ചിരുന്നത്. നിനക്കവനെ കണ്ടുകൂടായിരുന്നു എന്നെനിക്കു വളരെ പെട്ടന്നു തന്നെ മനസിലായി. അവനു‍ മാത്രമല്ല, നിന്റെ പുതിയ കൂട്ടുകാരനാവാന്‍ നിന്റെ പൂര്‍വ്വകഥകള്‍ ഞങ്ങളില്‍ മിക്കവര്‍ക്കും പ്രചോദനമായിരുന്നു.

നിങ്ങളൊക്കെ അന്ന്‌ കരുതിയിരുന്നതു പോലെ ഞാന്‍ ഒരു ലജ്ജാലുവും ശാന്തനുമൊന്നുമല്ല. (ഇത് നിനക്ക് പിന്നീട് മനസിലായെന്നെനിക്കറിയാം). മറുനാട്, വലിയ പരിചയമില്ലാത്ത സുഹൃത്തുക്കള്‍ എന്നീ കാരണങ്ങള്‍ കൊണ്ട് അധികം ബഹളമുണ്ടാക്കാതിരുന്നതു കൊണ്ടാണ്‌ എനിക്കങ്ങനെയൊരു പ്രതിച്ഛായ കിട്ടിയതെന്നു തോന്നുന്നു. ഞങ്ങള്‍ ഹോസ്റ്റലുകാര്‍ എപ്പൊഴും ഒന്നിച്ചായിരുന്നെങ്കിലും ആ കൂട്ടത്തിലെ ഒറ്റയാനായിരുന്നു ഞാന്‍ എന്ന് നിനക്കും എളുപ്പം മനസിലായിരുന്നല്ലോ. അവരുടെ കൂടെ എല്ലാത്തിനും ഞാന്‍ ഉണ്ടായിരുന്നെങ്കിലും നിങ്ങള്‍ പെണ്‍കുട്ടികളുടെ സംഘം എന്നെ ഒരു നിഷ്കളങ്കനായോ നിരപരാധിയായോ ഒക്കെയാണ് കണ്ടിരുന്നതെന്ന് എനിക്കറിയാം. അതു കൊണ്ടാണല്ലോ നിന്നെ ‘വളക്കാന്‍’ പരിശ്രമിച്ചിരുന്ന അവരെ ഒക്കെ അവഗണിച്ചു കൊണ്ട് നീ എന്നെ കൂടെ കൂട്ടിയിരുന്നത്. പതിനേഴാത്തെ പിറന്നാളിന്‌ ഹോണ്ട സിറ്റി അച്ചന്റെ സമ്മാനമായി കിട്ടിയ സ്ഥലത്തെ പ്രധാന പണക്കാരന്‍ ഐവന്റെ തുറന്ന പ്രണയാഭ്യര്‍ത്ഥന നീ നിരസിച്ചത് എന്നെ അല്‍പ്പമൊന്ന് അമ്പരപ്പിച്ചിരുന്നു. നമ്മുടെ ബാച്ചിലെ മറ്റ് സുന്ദരികള്‍ ഐവന്റെ കൂടെ കറങ്ങിനടക്കാന്‍ വേണ്ടി മത്സരിക്കുന്നത് നീയും കണ്ടിട്ടുണ്ടല്ലോ.

എന്നോടൊള്ള ഇഷ്ടത്തേക്കാള്‍ കൂടുതല്‍ നിന്നെ ഒളിഞ്ഞിരുന്നു കളിയാക്കുന്ന എന്റെ കൂട്ടുകാരെ അസൂയാലുക്കളാക്കാന്‍ വേണ്ടിയാണ് നീ എന്നോടടുത്തതെന്ന് ഞാന്‍ പറഞ്ഞാല്‍ നീ നിഷേധിക്കുമോ? മറുനാട്ടുകാരനായ ഞാന്‍‍ നിന്നെ കൊണ്ടുനടക്കുന്നതാണ് നിന്റെ പഴയ കൂട്ടുകാര്‍ക്കുള്ള മധുരപ്രതികാരം എന്ന് നീ കരുതിയല്ലേ? പക്ഷെ നീ ഒരു പകുതി മലയാളിയാണെന്ന് ഞാന്‍ അറിഞ്ഞത് ഒരുപാട് കഴിഞ്ഞായിരുന്നു. (ഇനി അതായിരുന്നോ നമ്മള്‍ തമ്മില്‍ അടുത്തതിനുള്ള നിന്റെ ന്യായം?) നീ ഒരിക്കലും നിന്റെ വീട്ടുകാരെക്കുറിച്ച് ഒന്നും പറയാറില്ലായിരുന്നല്ലോ. നീ ഒരു റെബല്‍ പ്രതിച്ഛായ സ്വയം വളര്‍ത്തിയെടുത്തതിനു കാരണക്കാര്‍ നിന്റെ വീട്ടുകാരായിരുന്നു എന്നായിരുന്നു എന്റെ ഊഹം. കോളേജ് സുന്ദരി ആവാന്‍ പറ്റുന്ന ഒരു റെബലിനെ ഞാന്‍ ആദ്യമായി കാണുകയായിരുന്നു. നിന്റെ ആ നുണക്കുഴികള്‍ വിരിയുന്ന കവിളുകളും പിന്നെ ആ പോണിടെയിലും പലരുടെയും ഉറക്കം‍ കെടുത്തിയിരുന്നെന്നുറപ്പ്. ഓഹ് ആ പോണി ടെയില്‍, അതും കുതിര എന്ന പേരിനൊരു കാരണമാവാം.

നിന്റെ ഇഷ്ടങ്ങള്‍ എന്റെയും ഇഷ്ടങ്ങളായി മാറിയത് പെട്ടെന്നായിരുന്നു. ബോളിംഗ് ഞാന്‍ പഠിച്ചെടുത്തതും നിന്നെ തോല്‍പ്പിക്കാറായതും നിന്നില്‍ മതിപ്പുളവാക്കാന്‍ വേണ്ടിത്തന്നെയായിരുന്നു. നിന്നോടൊപ്പം കറങ്ങി നടക്കാന്‍ ഞാന്‍ എന്റെ ആഴ്ചയവസാനങ്ങളിലെ ഫുട്ബോള്‍ വരെ ഉപേക്ഷിച്ചു. വസ്ത്രങ്ങള്‍ വാങ്ങാനുള്ള നിന്റെ ഭ്രമം കാരണം ഞാന്‍ നിങ്ങളുടെ വസ്ത്രങ്ങളുടെ പുതിയ ഫാഷനുകള്‍ വരെ പഠിച്ചു തുടങ്ങി. എന്നാല്‍ നീ‍ എന്നെ അര്‍ത്ഥം പഠിപ്പിച്ച ആദ്യ വാക്ക് ‘ഷിവല്‍റി’ എന്നതായിരുന്നു. അന്ന് നീ വീട്ടില്‍ പോകാന്‍ വേണ്ടി ബാഗുമായി കോളേജില്‍ എത്തിയതും, നിന്നെ ട്രെയിന്‍ കയറ്റി വിടാന്‍ വന്ന ഞാന്‍ നിന്റെ ബാഗ് പിടിക്കാനേല്‍ക്കാത്തത് കണ്ട നീ എന്നോട് ഷിവല്‍റി എന്ന വാക്കിന്റെ അര്‍ത്ഥം വെബ്‌സ്റ്റേഴ്സില്‍ നോക്കാന്‍ പറഞ്ഞതും ഞാന്‍ വ്യക്തമായി ഓര്‍ക്കുന്നു. പിന്നെയും നീ ഒരുപാട് വാക്കുകളുടെ അര്‍ത്ഥം എന്നെ പഠിപ്പിച്ചു - ‘സുഹൃത്ത്’ എന്നതിന്റെ അടക്കം.

തെറിച്ച പെണ്ണ് എന്ന നിന്റെ പ്രതിച്ഛായ തകരാതിരിക്കാന്‍ നീ മനഃപൂര്‍വ്വം പ്രയത്നിക്കുന്നതായി എനിക്ക് പലപ്പോഴും തോന്നിയിരുന്നു. നമ്മളൊന്നിച്ചു പോയ ഫാഷന്‍ ഫെസ്റ്റുകളിലും പാര്‍ട്ടികളിലും മറ്റും സ്വയം ആസ്വദിക്കുന്നതിനോടൊപ്പം തന്നെ നിനക്ക് പ്രധാനമായിരുന്നല്ലോ നമ്മുടെ അടുപ്പം മറ്റുള്ളവരെ കാ‍ണിക്കുന്നതും (ഞാനത് അങ്ങേയറ്റം ആസ്വദിച്ചിരുന്നു എന്നത് ഏറ്റുപറഞ്ഞില്ലെങ്കില്‍ ആത്മവഞ്ചനയാവും). ലോകം എന്തു വിചാരിക്കുന്നു എന്നതിനു തരിമ്പും പ്രാധാന്യം കൊടുക്കാറില്ലെന്ന് നീ ഇടക്കിടക്ക് പറയാറുണ്ടാ‍യിരുന്നെങ്കിലും നിനക്കിഷ്ടമുള്ളവരെ നീ ഭ്രാന്തമായി സ്നേഹിച്ചിരുന്നു, അവരുടെ കാര്യങ്ങളില്‍ അത്യന്തം ശ്രദ്ധിച്ചിരുന്നു എന്നെനിക്കറിയാം, സ്നേഹം എന്നതിന് സമൂഹം കൊടുത്തിരിക്കുന്ന അര്‍ത്ഥാന്തരങ്ങളെക്കുറിച്ച് നിനക്ക് പുച്ഛമായിരുന്നെങ്കിലും. ആഴ്ച തോറും കാമുകന്മാരെ മാറ്റുന്നവള്‍ എന്നതായിരുന്നു നീ എത്തുന്നതിനു മുന്‍പേ എത്തിയ നിന്റെ വിശേഷണങ്ങളില്‍ ഒന്ന്. എന്നാലും നമ്മള്‍ ഒന്നിച്ചുണ്ടായിരുന്ന ആ ഒരു വര്‍ഷം മുഴുവന്‍ കോളേജില്‍ എല്ലാവരുടെയും മുന്നില്‍ ഞാന്‍ തന്നെയായിരുന്നു നിന്റെ ‘കാമുകന്‍’ എന്നതും എന്നെ പലപ്പോഴും അമ്പരപ്പിച്ചിരുന്നു. പക്ഷെ നമ്മുടെതായ ലോകത്ത് കാമുകന്‍ എന്ന വാക്കിന് പ്രത്യേക അര്‍ത്ഥമൊന്നുമില്ല എന്നത് ഒരു പക്ഷെ നിന്നെക്കാള്‍ കൂടുതല്‍ എനിക്കറിയാമായിരുന്നു. നിന്നില്‍ ഒരു കാമുകിയെയോ ഭാവി ഭാര്യയെയോ കാണാന്‍ ഞാനൊരിക്കലും ശ്രമിച്ചിരുന്നില്ല, നിനക്കും അതു തന്നെ തിരിച്ച് ചെയ്യാന്‍ കഴിയാതിരുന്ന പോലെ തന്നെ. ഒരു ആണിനും പെണ്ണിനും വളരെ അടുത്ത സുഹൃത്തുക്കളായി തന്നെ തുടരാന്‍ കഴിയും എന്ന് നമുക്ക് രണ്ടു പേര്‍ക്കും അറിയാമായിരുന്നു. അതിരുകളും നിയന്ത്രണങ്ങളും ഇല്ലാത്ത ഒരു സ്നേഹബന്ധം നീ ആസ്വദിച്ചതിനോടൊപ്പമോ അതില്‍ കൂടുതലോ ഞാനും ആസ്വദിച്ചിരുന്നു. കെട്ടുപാടുകളില്ലാത്ത സ്വാതന്ത്ര്യം.

നീ താമസിച്ചിരുന്ന നിന്റെ അമ്മായിയുടെ വീട്ടിലെ ഒന്നാം നിലയിലെ നിന്റെ മുറിയില്‍ നിന്റെ വയലിന്‍ വായന കേട്ടു കൊണ്ട് തറയില്‍ മലര്‍ന്നു കിടന്ന സായാഹ്നങ്ങള്‍ മനസില്‍ ഇന്നും പച്ചപിടിച്ചു നില്‍ക്കുന്നു. നിന്റെ അമ്മായിയും എന്നെ ഭാവിയിലെ ഒരു കുടുംബാഗമായാണ് കണ്ടിരുന്നതല്ലേ? നമ്മുടെ തലമുറയുടെ രീതികളോടിണങ്ങിക്കഴിഞ്ഞു എന്നു കാണിക്കാന്‍ വേണ്ടി അവരത് മറച്ചുവെക്കാന്‍ വിദഗ്ദമായി പരിശ്രമിച്ചിരുന്നെങ്കിലും എനിക്കതു മനസിലാവുമായിരുന്നു. കോളേജില്‍ കാണിച്ചിരുന്ന റെബല്‍ സ്വഭാവം നീയൊരിക്കലും വീട്ടില്‍ കാണിച്ചിരുന്നില്ലെന്നും ഞാന്‍ ശ്രദ്ധിച്ചിരുന്നു. നിന്റെ സ്വാഭാവികമായ വശ്യമായ പെരുമാറ്റമായിരുന്നു അവിടെയും.

അവസാനത്തെ പരീക്ഷയും എഴുതി പിരിയാന്‍ നേരം നീയെനിക്കു തന്ന കൊച്ചു കാര്‍ഡിലെ വരികള്‍ പ്രവചനസ്വഭാവമുള്ളവയായിരുന്നു - “നമ്മള്‍ തമ്മില്‍ ഇനി ഒരിക്കലും കാണാതിരിക്കാനുള്ള ഒരു ചെറിയ സാധ്യത ഞാന്‍ കാണുന്നു, അങ്ങനെയാണെങ്കില്‍ ഈ ഒരു ജന്മത്തേക്കുള്ള സൌഹൃദം നീയെനിക്കു പകര്‍ന്നു തന്നു കഴിഞ്ഞു എന്നു നീ അറിയണം”. നിനക്കറിയാമായിരുന്നോ നമ്മള്‍ അകലാന്‍ പോകുകയാണെന്ന്‌? നിനക്കറിയാമായിരുന്നോ നീ എനിക്ക് പിടിതരാതെ അകലങ്ങളിലേയ്ക്ക് പോകാന്‍ ഒരുങ്ങുകയായിരുന്നെന്ന്? എന്റെ വിളികള്‍ക്ക് ഉത്തരം കിട്ടാതായപ്പോള്‍ നീ പുതിയ സ്ഥലവുമായി പരിചയപ്പെടുന്നതിന്റെ തിരക്കിലാണെന്നു ഞാന്‍ കരുതി. ഫാഷന്‍ ഡിസൈനിംഗിനു ചേര്‍ന്ന നീ പിന്നീട്‌ അവിടെ നിന്ന് മാറിയത് ഞാനറിഞ്ഞു. നിന്നെക്കുറിച്ചുള്ള വിവരങ്ങള്‍ എനിക്ക്‌ കിട്ടാതായി. പിന്നെ എപ്പൊഴോ കേട്ടു നീ വീണ്ടും നിന്റെ ജീവിതത്തിന്റെ ഗതി മാറ്റിയെന്ന്, അമേരിക്കയില്‍ നിന്റെ ബന്ധുക്കളുടെ അടുത്തേക്ക് പോയെന്ന്. അതായിരുന്നു നിന്നെക്കുറിച്ച് ഞാന്‍ അവസാനമായി അറിഞ്ഞത്.

പത്ത് വര്‍ഷങ്ങള്‍! ഇന്നിതെല്ലാം ഞാന്‍ വീണ്ടും ഓര്‍ത്തു. എം ടി “ഇന്ന് വര്‍ഷങ്ങള്‍ക്കു ശേഷം ലീലയെപ്പറ്റി ഞാന്‍ വീണ്ടും ഓര്‍ത്തു” എന്നെഴുതിയതു പോലെ ഞാനും നിന്നെപ്പറ്റി ഓര്‍ത്തു. എങ്ങനെയെന്നറിയണ്ടേ? ഒരുപാട് നാളുകള്‍ക്കു ശേഷം ഞാന്‍ ഇന്ന് റോബിന്‍സണെ വിളിച്ചിരുന്നു. അവനാണ് പറഞ്ഞത് നീ ഇവിടെ അമേരിക്കയില്‍ എന്റെ നഗരത്തിലുണ്ടെന്ന്. എനിക്കു വേണമെങ്കില്‍ നിന്നെ തിരഞ്ഞു പിടിക്കാം. പക്ഷെ എനിക്കതിനാവുന്നില്ല, ആവുമെന്നു തോന്നുന്നില്ല. ഓര്‍മ്മകള്‍ - സുഖമുള്ള ദുഃഖം പകര്‍ന്നു തരുന്ന ഈ ഓര്‍മ്മകള്‍ മരിക്കാതിരിക്കട്ടെ. ഭൂതകാലത്തിലെ ഈ സുന്ദരസ്വപ്നത്തെ എനിക്ക് വര്‍ത്തമാനകാലത്തിന്റെ പിടിയില്‍ നിന്ന് രക്ഷിക്കണം. ഈ ഒരു ജന്മത്തേക്കുള്ള സൌഹൃദം നീയെനിക്കു പകര്‍ന്നു തന്നു കഴിഞ്ഞു.

അല്‍ വിദാ!

57 comments:

Unknown said...

ആദീ,
അന്ന് ഞാന്‍ പറഞ്ഞത് നിന്നെ വേദനിപ്പിച്ചില്ല എന്ന് വിശ്വസിക്കാന്‍ എനിയ്ക്ക് ഇപ്പോഴും മടിയുണ്ട്. :-)

ആദീ,
നീ അവളെ തപ്പും എന്ന് ഞാന്‍ പറഞ്ഞാല്‍.... ഞാന്‍ പറഞ്ഞത് സംഭവിക്കരുത് എന്ന വാശി കൊണ്ട് മാത്രം നീ അവളെ തേടിയില്ലെങ്കിലോ എന്ന് ഞാന്‍ ഭയപ്പെടുന്നു.

മനോഹരമായ എഴുത്ത് മച്ചാ... തുടരൂ...

വേണു venu said...

ഓര്മ്മകള് - സുഖമുള്ള ദുഃഖം പകര്ന്നു തരുന്ന ഈ ഓര്മ്മകള് മരിക്കാതിരിക്കട്ടെ.
ആദിത്യന്‍, ഇതെനിക്കു മനോഹരം.ആശംസകള്‍.

ചില നേരത്ത്.. said...

ആദീ..
പ്രണയം-വിരഹം എന്നീ ദ്വയങ്ങളില്‍ നീ നിരന്തരമായി നടത്തികൊണ്ടിരുന്ന പരീക്ഷണം ഇവിടെ പൂര്‍ത്തിയായി കഴിഞ്ഞു. അതില്‍ പൂര്‍ണ്ണത കൈവരിച്ചു. ഇനി മേലാല്‍ ഇതുപോലൊന്ന് എഴുതിയാല്‍, പിന്നെ നീ ഗൂഗിള്‍ ചാറ്റില്‍ പിന്നെ പൊന്തില്ല.(ഭീഷണിയാണ്‍)
:)

വാളൂരാന്‍ said...

ആദീ,
മനോഹരം ഈ വാക്കുകള്‍...
പ്രണയം പൊഴിയുന്ന ഓര്‍മകളുടെ നിമിഷങ്ങള്‍...
ഈ അവതരണം വളരെ ആസ്വാദ്യം...

Rasheed Chalil said...

ആദീ മനോഹരമായ ശൈലിയില്‍ വിടരുന്ന പ്രണയം അസ്സലായിരിക്കുന്നു. ഒത്തിരി ഇഷ്ടമായി കെട്ടോ.

ഓടോ : അല്‍‌വിദ തിരിച്ചെടുത്ത് ഒന്നുകൂടി തപ്പഡേയ്...

ഞാന്‍ ഇരിങ്ങല്‍ said...

ബലേഭേഷ്....ബലേഭേഷ്....

മുസ്തഫ|musthapha said...

എന്തൊരെഴുത്തപ്പാ...

ശറപറേന്ന്... മഴ പെയ്യണ പോലെ...

കൊതിയാവണു :)

തറവാടി said...

ഒഴുക്കുള്ള അവതരണം , നന്നായാസ്വദിച്ചു

സുല്‍ |Sul said...

ആദീ, ആ അല്‍ വിദ നിനക്കു തിരിച്ചെടുക്കേണ്ടി വരും.

അതു തിരിച്ചെടുക്കാം എന്ന് ഏറ്റുപറഞ്ഞില്ലെങ്കില്‍ ആത്മവഞ്ചനയാവും. ശരിയല്ലെ.

-സുല്‍

അനംഗാരി said...

ആദീ, ജീവിതത്തില്‍ പലതും ഒരു നിമിത്തം പോലെ സംഭവിക്കുന്നതാണ്. ഇനിയിപ്പോള്‍ നാട്ടില്‍ തിരിച്ചു പോകാതിരിക്കാന്‍ ഒരു നിമിത്തം ആയില്ലേ? ചിക്കാഗോയുടെ തെരുവീഥികളില്‍ ഒരു പുതിയ വസന്തത്തിന്റെ വരവറിയിക്കുന്ന പ്രണയത്തിനായി ഞാന്‍ കാതോര്‍ത്തിരിക്കുന്നു.

ഓ:ടോ:ബാച്ചിക്ലബ്ബില്‍ നിന്ന് പുറത്ത് ചാടാന്‍ വെമ്പല്‍കൊള്ളുന്ന ഒരു ഹൃദയം ഞാന്‍ കാണുന്നു.

തണുപ്പന്‍ said...

അതി മനോഹരം ഈ പ്രണയ(?)വും വിരഹും ചേര്‍ത്ത് മൂപ്പിച്ചെടുത്ത ഈ പാല്പായസം.

വേണ്ട ആദീ, അവളെ ഇനി തിരയാനൊരുങ്ങണ്ട്. അതൊരു നീറുന്ന ഓര്‍മ്മയായി തന്നെ നില്‍ക്കട്ടേ !

കാളിയമ്പി said...

*
ആദി ദേവ നമസ്തുഭ്യം
പ്രസീദ മമ ഭാ‍സ്കരാ..
ബൂലോക മഹാദേവാ
പ്രഭാകര നമോ നമ..

ആദിയേ താങ്കളൊരു മോഹന്‍ലാലാകുന്നു
ഒരു അല്‍ കപ്പൂച്ചിനോ ആകുന്നു:)
ഒരു റോബര്‍ട്ടോ ഡീ നീറോ ആകുന്നു
അത്രയ്ക്ക് റേഞ്ജ്:)
*

കുറുമാന്‍ said...

ആദിയേ, സെയിം പിഞ്ച്,

ഇത്രയൊക്കെ ആ കുഞ്ഞു മനസ്സില്‍ ഉണ്ടായിരുന്നു എന്നു ഞാന്‍ അറിഞില്ല. എന്റെ തെറ്റ്. എന്റെ മാത്രം തെറ്റ്.

മനോഹരമായി എഴുതിയിരിക്കുന്നു.

പിന്നെ മാഷേ, എപ്പോഴും മുങ്ങിനടക്കാതെ, ഇടക്കൊക്കെ ഒന്നു വന്നു മുഖം കാണിക്ക്

ഉമേഷ്::Umesh said...

ആദിവര്‍ക്കിയേ,

എന്നാടാ ഇതു്? അപ്പോ പ്രൊഫൈലിലെ ആ ചരിഞ്ഞോടുന്ന കുതിര ആരാണെന്നു് ഇപ്പോള്‍ പുടിഞ്ചു്...

എഴുതുന്നതൊക്കെ സത്യമാണെങ്കില്‍ ആദി താമസിയാതെ ചരിഞ്ഞോടാന്‍ സാദ്ധ്യതയുണ്ടു്...

ദിവാസ്വപ്നം said...

Vow Adi !!

(sorry for using English)

I am not sure what to say here

take care, buddy...

:)

Inji Pennu said...

ആദിക്കുട്ടിയേ

“കാറ്റാടിത്തണലും തണലത്തറമതിലും
മതിലില്ലാമനസ്സുകളുടെ പ്രണയക്കുളിരും..”

ഇതു വായിച്ചിട്ട് എനിക്ക് പെട്ടെന്ന് സ്വയം വന്ന കവിതയിലെ രണ്ട് വരികള്‍ ഞാന്‍ കുറിച്ചിടട്ടെ .
ബാക്കി വരികള്‍ ഇനിയും ആലോചിച്ചു വരുന്നതേയുള്ളൂ:)

Unknown said...

ആദീ,
ഞാന്‍ മൂന്നാമതും വായിച്ചു.ഈ കമന്റുകളൊക്കെ നോക്കൂ. ഞാന്‍ പറഞ്ഞിരുന്നതും.

ആദീ, ഇപ്പോഴും ഒന്നും തോന്നുന്നില്ല? ;-)

Kuttyedathi said...

ആദിയേ.. വളരെ വളരെ മനോഹരം. വേറെ വാക്കുകളൊന്നും പറയാന്‍ കിട്ടുന്നില്ല.

ഇന്നലെ പറഞ്ഞതു പോലെ മൂലയിലേയ്ക്കൊതുങ്ങി കൂടിക്കോളൂ. പക്ഷേ, വല്ലപ്പോളുമിതുപോലുള്ള വായിച്ചാലും വായിച്ചാലും മതിയാവാത്തൊരു പോസ്റ്റുമായി വന്നേ പറ്റൂ. ആദിയ്ക്കു മാത്രം എഴുതാന്‍ പറ്റുന്ന ഈ ശൈലിയില്‍..

Kiranz..!! said...

ആദീ..സ്നേഹിത തീര്‍ച്ചയായും കാണേണ്ടിയ ഒരു കുറിപ്പ്..!

Visala Manaskan said...

ആദിയേ. എന്തൊരു കലക്കന്‍ പോസ്റ്റ്!!!
വളരെ വളരെ ഇഷ്ടപ്പെട്ടു. വളരെ വളരെ.
:) ആര്‍ഭാടായിട്ടുണ്ട് കുട്ടാ.. ആര്‍ഭാടം.

Adithyan said...

എന്റെ ബൂലോകകൂടപ്പിറപ്പുകളെ നിങ്ങടെ സ്നേഹം കമന്റായി ഇതു പോലെ വന്നു കൊണ്ടിരുന്നാല്‍ ഞാന്‍ ഇതുമാതിരി ചവര്‍ ഇനീം എഴുതിക്കൊണ്ടിരിക്കും :) (ഇതൊരു ഭീഷണിയല്ല). പിന്നെ ഒരു ഡിസ്‌ക്ലെയിമര്‍ ഇടാന്‍ മറന്നു - “ഈ കഥയും കഥാപാത്രങ്ങളും തികച്ചും സാങ്കല്‍പ്പികമാണ്. ജീവിച്ചിരിക്കുന്നവരോ മരിച്ചവരോ ആരുമായും എന്തേലും സാമ്യം തോന്നുന്നുണ്ടെങ്കില്‍ അത് വെറും യാദൃച്ഛികമാണ്”. ;)

ദില്‍ബാ,
ഡാ നെന്നെ ഞാന്‍ കൊല്ലും. നീ കാരണമാണിതെല്ലാം. നെന്റെ കമന്റ് കണ്ടാണിത് എന്റെ ആത്മകഥയാണെന്ന് എല്ലാര്‍ക്കും തോന്നുന്നത്. ആത്മകഥ ബ്ലോഗ് വഴി ഖണ്ഡശ്ശാ എഴുതി വിടാന്‍ ഞാന്‍ ആര് മഹാത്മാ ഗാന്ധിയോ?

ഡാ‍ാ ഇത് വെറും കഥയാണ്, ഞാന്‍ നെന്നോട് പറഞ്ഞത് വേറേ.... അതു കംബ്ലീറ്റ്‌ലി ഡിഫ്ഫറന്റ് ;)

വേണുമാഷേ,
ഒരുപാട് നന്ദി. ഇഷ്ടമായെന്നതറിഞ്ഞതില്‍ സന്തോഷം.

ഇബ്രാന്‍,
എന്നെക്കൊണ്ട് ഈ കടുംകൈക്കൊക്കെ പ്രേരിപ്പിച്ചോണ്ടിരുന്നത് നീ ഒരുത്തനാണ്. ഇനി നീ പറഞ്ഞാലൊന്നും ഞാന്‍ നിര്‍ത്തില്ല.സിബുവും ദിവായും ഒന്നും വീടു കയറി തല്ലാത്തിടത്തോളം ഞാന്‍ ധീരമായി മുന്നോട്ടു പോകും ;) നെന്റെ ജീടോക്ക് ഭീഷണിയൊന്നും എനിക്കൊരു പ്രശ്നമല്ല.

മുരളി,
ഈ കമന്റൊക്കെ കാണുമ്പഴൊള്ള ആ ഒരു സന്തോഷം. ഹോ.. :) താങ്ക്യൂ താങ്ക്യൂ

ഇത്തിരിയേ,
ഹഹ... താങ്ക്യൂ താങ്ക്യൂ... കഥയില്‍ തപ്പലില്ല. പ്ലീസ് ഇതെന്റെ ജീവചരിത്രമാക്കരുത്, ഒരു അപേക്ഷയാണ് :))

ഞാന്‍ ഇരിങ്ങല്‍,
:) താങ്ക്സ്... കളിയാക്കിയതാണോ? ;) അതോ തല്ലിയാലും കാര്യമില്ല ഞാന്‍ നന്നാവില്ലെന്നു വെച്ചിട്ടാണോ? (തമാശയാണേ :) )

അഗ്രജോ,
എന്നെ അങ്ങ് എടുത്തോ... എനിക്കു വയ്യ... ;)

തറവാടീ,
ഒരുപാട് നന്ദി :)

സുല്‍,
ഞാന്‍ ശക്തമായി വ്യക്തമാക്കുന്നു - കഥയില്‍ ചോദ്യോം പറച്ചിലും ഒന്നും ഇല്ല :)

അനംഗാരി,
ചിക്കാഗോയോ? തെരുവോ? പ്രണയമോ? എന്താണിത്? ;)
പിന്നെ ബാച്ചിലര്‍ ക്ലബ്ബില്‍ നിന്ന് ഇറങ്ങുന്ന കാര്യം, ഞാന്‍ എപ്പൊഴേ റെഡി, ഒരു പെണ്ണുകൂടി റെഡി ആയാല്‍ മതി ;)

തണുപ്പാ‍ാ,
യെ റ്റോ ബ്രൂട്ടേ ... :) ഒരു കഥയെഴുതാന്‍ ഇവിടെ സ്വാതന്ത്ര്യമില്ലേ? ഇതെന്തു നീതി ഇതെന്തു ന്യായം?

അംബിസാര്‍,
യെന്നാ പോയം ;) യെന്നാ പോയെട്രി ;))

എന്നെ കുളിപ്പിച്ച് കാലും കൂട്ടിക്കെട്ടി മൂക്കില്‍ പഞ്ഞിയും വെച്ച് പെട്ടിയില്‍ കയറ്റി കിടത്തിയല്ലോ. ഇനി കുഴീലോട്ട് എറക്കി വെച്ചാ മാത്രം മതി :))

കുറുമേന്‍ന്നേ,
കുഞ്ഞു മനസോ? ഇമ്മിണി ബെല്ലി ഒരു മനസല്ലേ? ;) ഞാന്‍ മുങ്ങിയൊന്നും ഇല്ലേയ്... ഇവിടെ ഒക്കെ തന്നെ ഉണ്ടേയ്...

ഉമേഷേട്ടാ,
ഒരു അമേരിക്കന്‍ ബുജി മറ്റൊരു അമേരിക്കന്‍ ബുജിക്കിട്ട് പാര പണിയുന്നതിനെതിരെ ഞാന്‍ നമ്മടെ ബുദ്ധിജീവി ക്ലബ്ബില്‍ ഒരു പ്രമേയം അവതരിപ്പിക്കാന്‍ പോകുവാ... വര്‍മ്മ സാര്‍, ഉമേഷേട്ടനൊരു വാണിംഗ് കൊടുക്കൂ....

എഴുതുന്നതൊന്നും സത്യമല്ലേ... :))

ദിവാ,
ഹഹഹ്... നന്ദി... ജബാ...ഡാങ്ക്സ്

ഇഞ്ചിയേച്ചിയേ,
ഇതെവിടുന്നോ പൊക്കിയതല്ലേ? എവിടെയോ കേട്ടിട്ടുണ്ടല്ലോ ;)ആലോചിച്ച് ബാക്കീം കൂടെ ഇടണേ...

ദില്‍ബാ,
നെന്റെ അടക്ക് എന്റെ കൈ കൊണ്ടാടാ...

കുട്ട്യേടത്തി,
ദേ പിന്നേം ഞാന്‍ പൊങ്ങിപ്പോയി. :)) നിങ്ങളൊക്കെ കൈ വെക്കുന്നതു വരെ ഞാന്‍ ഇനിയും ഇതുപോലത്തെ സംഭവങ്ങളുമായി വരും ;)

കിരണ്‍സ്,
സാര്‍, ഇങ്ങനെ ഒരു സ്നേഹിത ഒന്നും ഇല്ല. :) കഥയില്‍ സ്നേഹിതയില്ല എന്നല്ലേ?

വിശാലഗുരുവേ,
എന്താ ഇപ്പോ പറയുക... എല്ലാം അറിയാ‍മല്ലോ? ... നന്ദിയൊണ്ട് നന്ദി :))

Tedy Kanjirathinkal said...

ആദീ,
കിടിലം... കിടിലോല്‍‌ക്കിടിലം..

പോസ്റ്റും, കമന്റുകളും വായിച്ചശേഷം, പെട്ടന്ന് മനസ്സില്‍ മനസ്സിലോട്ടു വലിഞ്ഞു കേടിയത് ലാലേട്ടന്റെ ഒരു ഡയലോഗ് -
“പോലീസുകാരാ പോലീസുകാരാ, ഈ തഹസീല്‍‌ദാരുടെ വീട്ടിലോട്ടുള്ള വഴിയേതാ..?”
“എഴുതി വച്ചിരിയ്ക്കുന്നതു കണ്ടൂടേ..?”
“എഴുതി വച്ചിരിയ്ക്കുന്നതെല്ലാം സത്യമാവണമെന്നുണ്ടോ..? ഉദാഹരണത്തിനു ഞാന്‍ (സാഗര്‍ കോട്ടപ്പുറം) തന്നെ എന്തെല്ലാം എഴുതുന്നു..?”

എഴുതു മച്ചാ, എഴുത്... എഴുതി എഴുതി ചാക് :-)

Unknown said...

ആദീ,
ഈ ബ്ലോഗിന്റെ മുക്കിലും മൂലയിലും കുതിരയുടെ പടം കാണുന്നതിന്റെ കാരണം മനസ്സിലായി വന്നതാ‍യിരുന്നു, അപ്പോഴാ ദേ ഡിസ്ക്ലേയ്മര്‍. എന്തായാലും ഡിസ്ക്ലേയ്മര്‍ വിശ്വസിച്ചു!

റീനി said...

ആദി, നന്നായിരിക്കുന്നു. ഈ കഥയുടെ പണിപ്പുരയില്‍ ഒളിച്ചിരിക്കുകയായിരുന്നുവോ ഇത്രയും നാള്‍?
കക്ഷിയുടെ പേരു തരു, ഞങ്ങള്‍ക്കൊന്നു കാണണമെങ്കിലോ?

സ്വാര്‍ത്ഥന്‍ said...

ആദീ,
ഇതിന്റെ ബാക്കി, റോളര്‍ കോസ്റ്ററില്‍ തലകീഴായി മറിയുമ്പോള്‍ എതിര്‍വശത്തെ സീറ്റില്‍ തന്റെ പുതിയ കൂട്ടുകാരനെ അള്ളിപ്പിടിച്ചിരിക്കുന്ന അവളേ കണ്ടതിനേക്കുറിച്ച് നീ എപ്പഴാ എഴുതുന്നത്???

(എഴുത്ത് സൂപ്പര്‍ ഡാ)

സു | Su said...

:)

Kalesh Kumar said...

ആദീ, സാരമില്ല. പെണ്ണ് കെട്ടികഴിയുമ്പം ഒക്കെ ശരിയാകും!

(എഴുത്ത് സൂപ്പര്‍)

മനോജ് കുമാർ വട്ടക്കാട്ട് said...

ആദി, ചുമ്മാ ഒന്ന് പോയിക്കണ്ടേച്ച്‌ വരൂന്നേയ്‌. സൗഹൃദത്തിനുണ്ടോ ആദിയും അന്ത്യവും!

RR said...

ആദീ,
വളരെ നന്നായി എഴുതിയിരിക്കുന്നു. വേറെ എന്തു പറയാന്‍ :)

Unknown said...

ആദികവിയും, ആദിഗുരുവും, ആദിത്യനും സാക്ഷിയായി അദി കള്ളം പറയില്ലെന്നു കരുതുന്നു. എങ്കിലും ആ ഡിസ്ക്ലെയ്മര്‍ എല്ലാവരും ഉപയോഗിക്കാറുള്ളത്‌ ആടിനെപട്ടിയാക്കാനാണ്. ആസ്ഥിതിക്ക്‌.......?. എന്തായാലും രചനാ രീതി വളരെ നന്നായിട്ടുണ്ട്‌.

reshma said...

ആദീ, നീ ഒരു യുവതിയും കാണാന്‍ കൊള്ളാവുന്നവളും1 അല്ലെങ്കിലും പറയാതിരിക്കാന്‍ ആവുന്നില്ല-സുന്ദരം.

അശ്വമേധം വായിച്ചു മടങ്ങുമ്പോഴൊക്കെ ആദിത്യന്റെ ‘എഴുത്ത്’ വായിക്കാനിരിക്കുന്നേയുള്ളൂ എന്ന തോന്നലുമായാണ് ഞാന്‍ മടങ്ങാറ് എന്നും പറഞ്ഞോട്ടേ? :)

1. ബ്ലോഗാഭിമാനി. (2006, നവംബര്‍26)സെമിയുടെ ലോകം, കമന്റ് 20. ബൂലോകം.

Abdu said...

അവസാനം വരെ ആകാംക്ഷ സൂക്ഷിക്കാനാവുന്നുണ്ട്,
പക്ഷെ ചില വാക്കുകള്‍ ആവര്‍ത്തന വിരസത ഉണ്ടാക്കുന്നു,

എന്നാലും ഒന്നില്‍കൂടുതല്‍ തവണ വായിപ്പിക്കനുള്ള എന്തൊ ഇതിലുണ്ട്,അത് സത്യം

Adithyan said...

കാണാന്‍ കൊള്ളവുന്ന ഒരു യുവാവിന് ഇവിടെ യാതൊരു വിലയും ഇല്ലെ?

കാളിയമ്പി said...

ആദിയാശാനേ..വെഷമിയ്ക്കരുത്..
ഇല്ല

Anonymous said...

ഉണ്ടല്ലോ ആദി. ദില്‍ബൂന് ഇവിടെ നല്ല വിലയാണല്ലൊ. അല്ലെങ്കില്‍ ഫോട്ടോമിട്. നോക്കട്ടെ ;-)

qw_er_ty

വിശ്വപ്രഭ viswaprabha said...

ആദീ, ഇതു ഞാനാട്ടോ! qw_er_ty

Anonymous said...

മനോഹരമായ ശൈലി. ആശംസകള്‍.

വര്‍ണ്ണമേഘങ്ങള്‍ said...

ആദീ..
കുതിര എന്ന പേര്‌ എന്റെ ഒരു പഴയ സഹപാഠിയെ(സഹപാഠി മാത്രം) ഓര്‍മിപ്പിച്ചു.
നന്നായി..!

Promod P P said...

ആദി.. അതിമനോഹരം
ഇടയ്ക്കിടെ ഇങ്ങനെ ഒരൊന്ന് പോസ്റ്റെ
അല്ലെങ്കില്‍ സര്‍ഗ്ഗപ്രതിഭ ജടപിടിച്ച്‌ വാര്‍ദ്ധക്യത്തിലേയ്ക്ക്‌ കൂപ്പുകുത്തും

ങെ!!! അജ്ഞാതവാസം അവസാനിപ്പിച്ച്‌ ഇഞ്ചി തിരിച്ചെത്തിയോ?

Siju | സിജു said...

ഇഷ്ടപെട്ടു
qw_er_ty

ബിന്ദു said...

“നമ്മള്‍ തമ്മില്‍ ഇനി ഒരിക്കലും കാണാതിരിക്കാനുള്ള ഒരു ചെറിയ സാധ്യത ഞാന്‍ കാണുന്നു, അങ്ങനെയാണെങ്കില്‍ ഈ ഒരു ജന്മത്തേക്കുള്ള സൌഹൃദം നീയെനിക്കു പകര്‍ന്നു തന്നു കഴിഞ്ഞു എന്നു നീ അറിയണം”.
ഈ വരികള്‍ വളരെ ഇഷ്ടപ്പെട്ടു.
നന്നായിട്ടുണ്ട് ആദി.:)
അതേയ് ആ പെണ്ണിന്റെ പേര് അശ്വിനി എന്നാണോ? :)

വല്യമ്മായി said...

പോയവര്‍ അതിന്റെ വഴിക്ക് പോട്ടെ,മുന്നിലുള്ള വഴിയിലെവിടെയോ അതിലും നല്ലൊരാള്‍ കാത്തു നില്പ്പുണ്ടെങ്കിലോ

sreeni sreedharan said...

ആദിയേ ‘ശരപഞജരം’ ആര്‍ഭാടം കൊള്ളാം.
(സത്യന്‍ ചേട്ടനെ യേതു മുറീലു പൂട്ടിയിട്ടാലും, പുള്ളി ഒരു ദിവസം പുറത്ത് വരും, മറക്കണ്ടാട്ടോ ;)

എന്തായാലും ആര്‍ഭാടം തുടരട്ടെ!

Siji vyloppilly said...

എന്തായാലും ഒറ്റയിരുപ്പിനു കഥ വായിപ്പിച്ചു.ഇനി അവളെ തിരയാതിരിക്കുന്നതാണു നല്ലത്‌.ഓര്‍മ്മകളില്‍ തന്നെ ജീവിക്കട്ടെ.'നവാഗതരെ ഇതിലെ' എനിക്കു നന്നായി പ്രയോജനം ചെയ്തു.ഏനിക്കു ഒരുസംശയമുണ്ട്‌.എന്താണ്‌ പിന്മൊഴിയില്‍ ഏഡ്‌ ചെയ്യുകയെന്നുവച്ചാല്‍? അതെങ്ങിനെ സാധിക്കും?

Adithyan said...

റ്റെഡീ,
ആ പറഞ്ഞതു സത്യം :) ഞാന്‍ എന്തെല്ലാം എഴുതുന്നു.

സപ്തന്‍ പുലീ,
ഹഹഹ്.. അപ്പോള്‍ അതാണു കുതിര. അല്ലാതെ വേറേ ഒന്നും അല്ലെന്ന് എല്ലാര്‍ക്കും മനസിലായല്ലോ. പിന്നെ ഡിസ്ക്ലെയിമര്‍ ഒരാളേലും വിശ്വസിച്ചല്ലോ, സധാമാനമായി ;)

റീനിയേ,
പണിപ്പുരയിലാരുന്നു. പേരോ? ഏതു പേര്? ഡിസ്‌ക്ലെയിമര്‍ വായിച്ചില്ലയോ? ;)

സ്വാര്‍ത്ഥോ,
ഡാങ്ക്സ്... അതാണ്, ആ പറഞ്ഞതാണ് അടുത്ത പാര്‍ട്ട്... ഹഹഹ്ഹ..

സൂച്ചേച്ചി,
താങ്ക്യൂ... സൂച്ചേച്ചീടെ ചിരിയേക്കാള്‍ നല്ല കോംബ്ലിമെന്റൊന്നും ഇല്ലെന്നാണ് വിശ്വേട്ടന്‍ പറഞ്ഞിരിക്കുന്നെ. :)

കലേഷേ,
ഹഹ... എന്നെ ഒതുക്കി. :) ഇനി ഇത് ശരിയാക്കാന്‍ വേണ്ടി ഒരു പെണ്ണു കെട്ടിക്കളയാം.

പടിപ്പുരേ,
യ്യോ... കഥയില്‍ പോക്കും കാണലും ഒന്നും ഇല്ല. :)

ആര്‍ ആര്‍,
അപ്പോ ഞാന്‍ ഒരു നന്ദി പറയാം.

പൊതുവാളോ,
ഞാന്‍ കള്ളമേ പറയില്ല. ആദ്യമായി ആ ഡിസ്‌ക്ലെയിമര്‍ ആടിനെ ആടാക്കാന്‍ ഉപയോഗിച്ചത് ഞാനാണല്ലേ? ;) നന്ദി.

രേഷ്മേച്ചി,
രേഷ്മേച്ചിയുടെ എഴുത്തിന്റെ ഒരു ആധാരകനാണ് ഞാന്‍. ഈ കമന്റ് വായിച്ച് ഞാന്‍ ഫ്ലാറ്റ്. പക്ഷേങ്കില്‍ ആ തോന്നലൊക്കെ വെറും വെറുതെയാണെന്ന് ഞാന്‍ ഒന്നു പറഞ്ഞോട്ടേ? പ്രതീക്ഷ വെക്കല്ലേ പ്രതീക്ഷ വെക്കല്ലേ :))

ഇടങ്ങള്‍,
ചില വാചകങ്ങള്‍ ശരിയായില്ല എന്നെനിക്കും തോന്നി, പക്ഷെ നന്നാക്കാന്‍ പറ്റിയില്ല. നന്ദി.

തനിമ,
ആശംസയ്ക്കു നന്ദി. :)

വര്‍ണ്ണം,
സഹപാഠി തന്നെ എന്ന് ഞാന്‍ വിശ്വസിച്ചു. താങ്ക്സ് ചുള്ളാ...

തഥാഗതാ,
താങ്ക്യൂ താങ്ക്യൂ.... :) എന്റെ കാര്യത്തില്‍ പ്രതിഭ അധികമില്ല, ഉള്ളതു കൊണ്ട് ഓണം പോലെ ;)

സിജു,
ഡാങ്ക്സ് ഉണ്ടേയ്...

ബിന്ദുവേച്ചീ,
ആ വരികള്‍ യഥാര്‍ത്ഥത്തില്‍ ഞാന്‍ കേട്ട വരികളാണ് :) ദേ ഞാന്‍ ചാറ്റില്‍ പറയുന്ന രഹസ്യങ്ങള്‍ ഇവിടെ പരസ്യമാക്കാന്‍ പാടില്ല ;))

വല്യമ്മായി,
യ്യോ... ആരും പോയില്ലേ... ഒരു കഥാകാരന്റെ സ്വാതന്ത്ര്യം??? ;)

പച്ചാളം,
ഹഹ്ഹ... ശരപഞ്ചരം എനിക്കിഷ്ടപ്പെട്ടു. പക്ഷെ ഈ കോണ്‍ടക്‌സ്റ്റില്‍ കുതിരയെ കുളിപ്പിക്കണം എന്നൊക്കെ പറഞ്ഞാല്‍ ആഭാസത്തരം ആകുമല്ലോ ;)

സിജി,
ഇഷ്ടെപ്പെട്ടു എന്നറിഞ്ഞതില്‍ സന്തോഷം.
പിന്മൊഴി എന്നത് ഒരു ഗൂഗിള്‍ ഗ്രൂപ്പ് ആണ്. ആ പോസ്റ്റില്‍ അതിന്റെ അഡ്രസ്സ് ഉണ്ട്. ഒരു ജീമെയില്‍ ഐഡി ഉണ്ടാക്കിയാല്‍ ആ ഗ്രൂപ്പില്‍ ഒരു മെമ്പര്‍ ആയി ജോയിന്‍ ചെയ്യാം.

Anonymous said...

വളരെ മനോഹരമായി എഴുതിയിരിക്കുന്നു. പത്തു വര്ഷം എന്നതു കേട്ടപ്പോള്‍ ഓര്ത്തതാണ്‍.. ഇഷ്ടപ്പെട്ട ഒരു പാട്ട്. Ten years gone by Led Zeppelin. (Going back to that first love ten years later.. എന്നോ മറ്റൊ ആണു.)

Then as it was, then again it will be
An' though the course may change sometimes
Rivers always reach the sea
Blind stars of fortune, each have several rays
On the wings of maybe, down in birds of prey
Kind of makes me feel sometimes, didn't have to grow
But as the eagle leaves the nest, it's got so far to go

ഓഫ്: ആദ്യമായിട്ടാണു മാത്രുഭാഷയില്‍ കമ്മന്റു ചെയ്യുന്നതു.. എതുവഴിയോ ഇവിടെ എത്തി. കമ്മന്റാതെ പോകാന്‍ വയ്യ. :)

Siji vyloppilly said...

ആദി,
ഞാന്‍ പിന്മൊഴിയില്‍ ചേര്‍ന്നുകഴിഞ്ഞു.എനിക്കിപ്പോള്‍ അവിടെനിന്നു മെയിലും വരുന്നുണ്ട്‌.
വളരെ വളരെ നന്ദി.

Anonymous said...

അതിയാന്റെ ചുണ്ടുകളു പോലല്ല,.. സ്നെഹിത മതിഭ്രമമുണ്ടാക്കാതെ അതിയാന്റെ തൊട്ടടുത്തു തന്നെ നില്‍ക്കുന്നു... നന്നായിരിക്കുന്നു.
-ചിത്രകാരന്‍
www.chithrakaran.blogspot.com

Peelikkutty!!!!! said...

നന്നായി എഴുതിയിട്ടുണ്ട്.

qw_er_ty

Shiju said...

ഇത് ചതിയാണ്. ഇന്നലെ ഇട്ട ഫോട്ടോ പോസ്റ്റ് എവിടെ പോയി? വേഗം തിരിച്ചിട്ടോ അല്ലേങ്കില്‍ അത് പലരുടേയും പോസ്റ്റുകളിലൂടെ ബൂലോകത്തില്‍ കറങ്ങി നടക്കും

Adithyan said...

ഷിജ്വേ, പേടിപ്പിക്വാ‍ാ?
ജീവികാന്‍ സമ്മതിക്കൂലാ‍ാ‍ാ?

സുജയ-Sujaya said...

വല്ലാത്ത നോസ്റ്റല്‍ജിയ തോന്നുന്നു. ഒരു നഷ്ടബോധം. എന്തൊക്കെ തൊട്ടുണര്‍ത്തിയ പോലെ

അരവിന്ദ് :: aravind said...

അവസാനത്തെ വാക്കു കണ്ട് ഒന്നു ഞെട്ടി.
അരവിന്ദാ!!!
എന്നാണ് വിളിച്ചാതെന്നാദ്യം തോന്നി.

പക്ഷേ ആദീ..ശരിക്കും പറേവാ.
ഇമ്മാതിരി കാമ്പസ് കഥയെഴുതാന്‍...അതില്‍ ആ കാലത്തിന്റെ ആ ഒരു ചൂട്, ആ നൊമ്പരം, ആ കാമം, ആ ആവേശം...ആ വിരഹം...അതെല്ലാം അനുഭവിക്കാന്‍...ആദി തന്നെ വേണം.

ഞാന്‍ ആദിയുടെ ഫാനാണ് എന്ന് പണ്ടേ പറഞ്ഞല്ലോ.
യൂ ആര്‍ വണ്‍ ആന്റ് ഒണ്‍ലി, കാമ്പസിന്റെ കഥാകാരന്‍.

Unknown said...

ആദീ..പ്ലീസ്..തപ്പിയേ മതിയാകൂ...

അല്ല..എനിക്കുറപ്പുണ്ട്..അങ്ങിനെയല്ലാതിരിക്കാന്‍ താങ്കള്‍ക്കാവില്യ....
നഷ്ടപ്പെടുനന്‍ സൌഹൃദങ്ങളുടെ വേദന മനസില്ലാക്കിയവര്‍ക്കതിനാവില്യ..ഒരിക്കലും....

myexperimentsandme said...

ഇതിപ്പോഴാ കണ്ടത്.

എന്തൊരെഴുത്താണപ്പാ, സൂപ്പര്‍.

അരവിന്ദന്‍ പറഞ്ഞത് തന്നെ.

Khadar Cpy said...

ഇത്ര വൈകിയല്ലോ ഇവിടെ എത്താന്‍ എന്ന ദുഃഖം മാത്രം ബാക്കി... ആദിക്കാവുമോ വിരഹാശ്വത്തെ തളച്ചിടാന്‍???

Anonymous said...

manassil ariyathe oru nombaram. aadi athu njanayirunno